Den e relato aki nos lo trata kon poderoso 1% di kambio ta, e importansia di kultivá bon sistemanan na lugá di metanan, e énfasis riba identidat na lugá di resultado, i kon pa konstruí bon hábitonan pa medio di e 4 leinan di kambio di komportashon.
Ora nos tuma e desishon pa trese kambio den nos bida, hopi biaha nos ta tuma e desishon pa kuminsá ku un kambio drástiko of ku dalmentu di un stap grandi ku otronan a bisa nos lo kambia nos bida. Pero, kon lo ta si ahustenan chikitu den nos bida di tur dia por yuda nos logra kambionan eksepshonal? Anto, kewbo si mehoramentunan chikitu den nos rutina di bida tin e potensial pa logra hasta un kambio mas grandi ainda? Ripitiendo mehorashonnan chikitu durante un periodo largu hopi biaha ta resultá den mas benefisio. Kambio real ta bini for di efektonan kombiná di sentenares di desishonnan chikitu òf di hábitonan chikitu ku ta keda akumulá durante di tempu i ku ta duna resultadonan eksepshonal. E metanan di e kambionan chikitu mester kambia nos estilo di bida, nos komportashon i nos identidatnan.
Djis Hasi un Mehoramentu di 1%
E poder di kombinashon ta formidabel, tantu positivo komo negativo. Si kada dia nos bira 1% mas mihó, nos lo tin komo resultado di ta 37% mihó na fin di un aña, sinembargo, di mesun manera, si nos bira 1% pió kada dia durante 1 aña, nos lo basha bini abou te kasi 0%. Hábitonan ta e interes kombiná di superashon personal.
Por parse ku habitonan no ta signifikante riba sierto dia, pero durante lunanan i añanan, e impakto por ta enorme.
E Poder di Benefisionan Chikitu
1% mas mihó kada dia 1.01³⁶⁵ = 37.78
1% mas malu kada dia 0.99³⁶⁵ = 0.03
Mehoramentu of dekadensia 1 aña – Credit: JamesClear.com
Hopi biaha ta difisil pa wak e kuadro mas grandi i nos no ta pensa riba e hábitonan ei pasobra nan ta parse asina chikitu i no ta duna asina tantu resultado riba e dia ku nos ta haña nan, i e por tuma asina tantu tempu pa logra resultadonan.
Den nos sosiedat, nos ta akustumbrá ku gratifikashon instantáneo, i e ta duru pa enfoká riba kosnan ku tin benefisionan riba termino largu.
Esaki por ta peligroso pasobra, na e banda negativo di e habitonan ei, e rapides pokopoko di transformashon tambe ta transmití habitonan poko saludabel ya ku ta realmente fásil pa laga hábitonan malu slùip drenta. Por ehèmpel, kome malu òf no hasi ehersisio; i si nos ripití e 1% di erornan ei tur dia nan lo guia na problemanan mas grandi. “Tempu ta hasi e margen entre éksito i frakaso mas grandi, lo e multipliká loke sea ku abo ta aliment’e.”
Resultadonan di bon hábitonan no ta linia rekto. Hopi biaha e resultado ta tuma tempu i esaki ta hiba na legumai nan numa ora ku nos no ta mira e resultadonan ku nos ke. Manera e outor ta ilustrá den e kuadro aki bou, si nos por vense e “ vaye di desapunto” kaminda, ora nos introdusí un hábito nobo, e no ta duna resultado asina lihé manera nos ke pero nos ta sigui persistí ku e hábito, e kresementu ku nos lo eksperensiá lo ta masivo.
E “hoogvlakte” di potensial inaktivo
Resultadonan
Loke abo ta pensa ku mester pasa
Loke aktualmente ta pasando
Tempu
Vaye di desapunto
Enfoká riba e sistema, no riba e metanan
E ganadó i e perdedó tini e mesun meta
Tantu hende eksitoso of hende sin eksito ta kompartí e mesun meta. Tur hende ku solisitá pa un trabou ta kompartí e mesun meta pa haña un trabou. Ke men ku no ta solamente e meta ta pone hende ta eksitoso of pa haña un trabou. E meta semper teinan. Ta solamente ora nan implementá un sistema di mehoramentu chikitu, nan lo alkansá e meta.
Alkansá un meta ta solamente un kambio di momentu
Imaginá bo ku bo a pone un meta pa tin un ambiente limpi. Bo mester obligá bo mes pa hasi limpi awe i lo bo tin un ambiente mas limpi. Pero si bo mantené e mesun hábitonan i sistemanan malu i sushi, lo bo tin na promé lugá un ambiente desordená, i pronto lo bo ta mirando un montón di sushedat ku bo ta spera di pone bo mes pa hasié limpi. Dor ku nunka bo a kambia e sistema ku ta su tras, bo ta keda ku e mesun resultado. Bo a dil ku un sistema sin atendé ku e raís di e problema. Alkansando un meta solamente ta kambia bo bida pa un momentu. Esei ta e kos kontrario na loke hende ta spera di forma intuitivo¹. Nos ta enfoká riba e resultadonan ku nos ke alkansá, pero e resultadonan nó ta e problema. Loke nos tin di kambia ta e sistemanan ku a hiba nos einan ku a kousa e resultadonan ei. Pa nos por mehorá nos mester kambia nos sistemanan.
Metanan ta restringí nos felisidat. Hopi biaha nos ta pensa ku “Asina mi alkansá mi meta lo mi ta felis”. Hopi biaha nos ta wanta nos felisidat te ora ku nos yega e siguiente etapa. Si mi haña e trabou di mi soño, e ora ei lo mi ta felis. Felisidat ta bira destinashon. Nos ta drenta un dualismo² di: sea mi ta alkansá mi meta i lo mi bira felis, òf mi ta un frakaso. Un mentalidat di sistema ta laga nos enamorá di e proseso en bes di e resultado. Bo no mester warda pa duna bo mes pèrmit pa ta felis.
E metanan ta den desakuerdo ku e progreso riba tèrmino largo. E metanan por generá e efekto di yo-yo. Hopi eskritor ta traha duru pa skibi nan promé buki i publik’e. Pero asina ku e buki ta publiká nan ta stòp ku skibimentu. No tin nada pa motivá nan. Ora tur bo trabou duru ta enfoká riba un meta, kiko a sobra pa pusha bo dilanti ora ku bo a alkans’e? Pesei hopi hende ta kai bèk den nan kaminda antiguo asina ku nan alkansá un meta. E propósito di ponementu di metanan ta pa gana e wega. E propósito di konstruí sistemanan ta pa kontinuá hungando e wega. Bèrdadero pensamentu riba tèrmino largu ta pensamentu sin meta. No ta trata aki di un logro so. Ta trata aki di e siklo di refinamentu i mehoramentu kontinuo. Den último instansia, ta bo kompromiso ku e progreso ta esun ku lo determiná bo èksito
Enamorá di e Sistemanan
Metanan por proveé direkshon i hasta pusha bo dilanti riba tèrmino kòrtiku, pero na final, un sistema bon diseñá semper lo sali ganadó. Loke ta konta ta ku bo tin un sistema. Dedikashon na e proseso ta loke ku ta hasi e diferensia.
Identidat ta e Yabi di Kambio di Hábito
Ora ku nos resolvé problemanan den tèrminonan di resultadonan, esakinan hopi biaha ta solamente temporal, pero pa logra solushonnan riba tèrminonan largu (pèrdè peso, sea saludabel) nos mester kambia nos identidat.
E yabi pa konstruíi hábitonan di tèrmino largu ta di enfoká riba kreashon di un identidat nobo promé. Bo komportashon ta un reflekshon di bo identidat. Loke ku bo ta hasi riba un base di dia pa dia ta e imagen di e persona ku bo ta kere ku bo ta (konsientemente i supkonsientemente).
Teniendo e identidat di un persona saludabel ta enkurashá nos pa ta e persona aki. Dor di bira un persona saludabel i tumando e identidat aki lo bo ta mas inkliná pa hasi mihó eskohonan enkuantu e tipo di alimento ku bo ta kome i kon pa trata bo kurpa ora ku e ta na su prestashon tòp pa medio di ehersisio, meditashon, èts. Dor di bisa ku mi ta un persona saludabel i pesei ta un persona saludabel, lo mi kome alimento saludabel i hasi ehersisio regularmente, bo ta kuminsá adaptá e komportashon di hendenan saludabel, i mirando bo mes komo saludabel lo bo frekuentá restorantnan di salú i asosiá ku hendenan ku tin e mesun manera di pensa i dor di esei reinforsá bo identidat nobo.
Tres Nivel di Kambio di Komportashon
Efektonan
Prosesonan
Identidat
Kon Nos ta Edifiká Hábitonan?
E outor ta deskribí 4 etapa pa edifiká hábitonan:
Spièrtamentu
Deseo fuerte
Reakshon
Rekompensa
E spièrtamentu ta aktivá e selebre pa start un akshon, e deseo fuerte ta proveé e forsa di motivashon, e kontesta ta e hábito ku nos ta ehersé i e rekompensa ta e meta final. E 4 etapanan aki ta wòrdu yamá dor di e outor: e lei di kambio di komportashon.
E prome lei (spièrtamentu) ta pa hasié ópvio, e ta konsistí den hasi nos ambiente rònt di nos un spièrtamentu. Por ehèmpel, si bo ta warda algun kuki of otro kos dushi den bo kushina, lo bo ta mas inkliná pa kome nan, pero si bo a disidí pa biba saludabel i pone na su lugá algun bakoba of apelsina, lo bo wòrdu rekordá pa kome nan na lugá di e otro ya komo ku ta nan ta bo dilanti kada bes ku bo drenta kushina. E ta e prinsipio di diseño di ambiente ku ta: bo ke pone ménos stap entre abo i bon komportashon i mas stap entre abo i e mal komportashon.
E segundo lei (deseo fuerte) ta pa hasié atraktivo. No ta sufisiente pa hasi e spièrtamentu pa bo hábito nobo opvio—bo tin di hasié tambe sufisiente interesante pa bo sistema nobo pa asina pusha bo pa kuminsá move. Komo sernan humano, nos ta wòrdu motivá dor di e rekompensanan ku hábitonan ta proveé, i asina, hasiendo nan atraktivo, lo hasi hábitonan mas fásil pa nos kultivá.
E terser lei (reakshon) ta pa hasié fásil. Redusí e frikshon entre abo i e hábito ku bo ke forma. Por ehèmpel, si bo ke toka kitara, teniendo e kitara banda di bo lessenaar of banda di bo kama, lo hasie mas fasil pa rekordá bo meta pa toka músika ku ora bo tin bo kitara bou di bo kama.
I e di kuater lei (rekompensa) ta pa satisfasé bo inmediatamente. Nos selebre ta preferá muchu mas tantu rekompensa inmediato ku rekompensa ku ta tarda. E outor ta bisa: “loke ku ta rekompensá inmediatamente lo wòrdu ripití i loke ku ta kastigá inmediatamente lo keda evitá”. Nos ta risibí un eksploshon di dopamine³ riba plaso kòrtiku ora ku nos bai e “drive-thru” di McDonalds, òf ora, despues di un dia largu, nos subi nos plataforma di “social media”, hañando mas gana pa ripití e hábito. Por ehèmpel, si nos hasi baimentu di gym un akto plasentero pasobra nos ta bai tin nos aktividat faborito, esaki lo hasié mas gratifikante.
Konklushon:
Ounke ku, usualmente, nos no ta pensa riba nos mal hábitonan òf kon nan tin impakto riba tèrmino largu den nos bida, e gran potensial di hábito atómiko ta e énfasis ku ta wòrdu poné mas bien riba e sistema ku riba e metanan, identidatnan mas bien ku resultadonan, i hábitonan chikitu mas bien ku kambio drástiko.
Hábitonan chikitu ta finalisá profundisando, ounke ku nan por parse insignifikante na prinsipio, ku tempu, nan ta kapas di transformá nos bida.
¹Basá riba loke hende ta sinti di ta bèrdat hasta sin rasonamentu konsiente
² Un partimentu na dos
³ Un neurotransmitter (sustansia) ku ta pertenesé na e sistema di rekompensa di e selebre. E ta pone nos sinti nos mes satisfecho i rekompensá.
